Атырау облысы бойынша кедендік бақылау департаменті «Әуежай Атырау» кедендік қосынының қызметкерлері декларацияланбаған киімнің ірі партиясын анықтады.
Департаменттің баспасөз қызметі хабарлағандай, декларацияланбаған тауар «Ыстамбұл-Атырау» бағытындағы № 870 халықаралық әуе рейсі келгеннен кейін ұшып келу аймағында анықталды. Жалпы салмағы 171,5 келі болған тауар 5 қорапқа және үлкен жол сөмкесіне салынған. Ол тәркіленіп, тексерілу үшін әуежай аумағындағы уақытша сақтау қоймасына қойылды.
Тексеру барысында одан 93 ерлер костюмі, 7 кеудеше және ерлердің 11 иленген тері тоны анықталды.
«Ресми мәлімденбеген жүктің иесі Түркия азаматы болып шықты. Сот-тауарлық сараптаманың қорытындысына сәйкес анықталған тауарлардың жалпы бағасы 3 миллион 15 мың теңгені құрады, бұл 100 АЕК-тен асады. Аталған факті бойынша қылмыстық іс қозғалды», - деп ақпараттандырды Атырау облысы бойынша кедендік бақылау департаментінің баспасөз қызметінен.
