«Торпедо» Cанкт-Петербор қаласынан құрқол қайтты. Жоғары хоккей лигасы тұрақты чемпионатының 16-шы турында Нева өзенінің жағасындағы шаһарда «СКА-Нева» командасымен кездескен өскемендік ұжым 2:3 есебімен жеңіліс тапты.

Естеріңізге салайық, осыдан бірер күн бұрын жерлестеріміз дәп сол Петерборда тағы бір жергілікті командамен шеберлік байқасқан болатын. Сол ойында торпедолықтар былтырғы чемпионаттың жеңімпазы «Динамоға» жол берген-ді. Есеп 1:2.

Енді міне «СКА-Нева» хоккейшілеріне де есе жіберген «Торпедо» осылайша екі ойында нөл ұпайға ие болып, турнирлік кестедегі жағдайын жақсарту мүмкіндігін пайдалана алмай қалды.

Айта кетейік, «СКА-Нева» командасымен өткізген ойында өскемендік ұжым сапында Кирилл Тамбиев пен Николай Складниченко көзге түсті.

Осы жеңілісінен кейін 16 ұпайға ие торпедолықтар турнир кестесінің 15-ші сатысында орналасуда.

Келесі кездесуінде жерлестеріміз Ханты-Мансийск қаласында жергілікті «Юграға» қарсылас атанбақ. Бұл матч ертең, 21 қазан күні өтеді.