Бүгін Өскеменде Ұлан ауданының мәдени күндері жалғасып жатыр.

Өскемендегі Арбатта Ұланның келіндері бауырсақ пісіріп, шай құйып, шеберлік байқасты, деп хабарлайды Altaynews.kz тілшісі.

Алайда қатысушылар бір-бірімен бәсекеге түспеді.

Ұлан ауданының мәдени күндері осылай жалғасып жатты. Көзді арбаған әсем Арбатта көрме де болды. Қазақы бұйымдардың түр-түрі бар. Әрі ұландықтар кіреберіске кереге жайып, ағаш есік орнатып қойған. Бейне бір сән-салтанаты келіскен зәулім киіз үйдің ішінде кең тыныстап жүргендей боласың.

Тоқсан бес жылдық тарихы бар керуен тартып бара жатқан Ұлан ауданының кешелі бері өтіп жатқан мәдени іс-шаралары қалалықтардың есінде қалары анық.

Айта кетсек, кеше ауданның мәдени күндері аясында үлкен гала-концерт өткізілген болатын. Бүгін мәдени күндер жәрмеңкемен жалғасты.