«Өскемен аумағында картаға мүлде енбеген, әкімі де, басқасы да білмеген, өркениеттен қалыс ауыл бар екен». Әлеуметтік желілер мен ақпараттық сайттар осылай деп дулатып жатыр. Иә, «бұл қалай болғаны сонда?» деп, біздің де таңғалған жайымыз бар. Әлгі ауылда өзге ғаламшарлықтар тұрып жатыр ма? Олардың «бізбен» қатынасы қалай? Деп дереу қала әкімдігінің баспасөз қызметкеріне қоңырау шалған едік.

– Меновной кенті маңынан сегіз жыл бұрын жеке тұрғын үй құрылысы үшін жер беріле бастаған. Бірақ сол кезде сатып алушыларға құрылыс бастауға ерте екендігі ескертіліп, кей жағдайда коммуникация болмай қалатындығы айтылған. Расымен де, онда орнатылған трансформатор нақты адам санына есептелмегендіктен кейде өшіп қалады. Қыста қары күрелмейді, көктемде жолы иленіп, саз болып жатады, – деді Әлібек Тұрсымбетов мән-жайды түсіндіріп.

Ал «белгісіз» ауыл туралы шаһар басшысы Жақсылық Омар есеп беру жиынында естіпті. Сол ауылдың тұрғыны өздерінің жай-күйін айтып, арыз-аманатын жеткізген.

Мәселен, Сара Ламурова есімді тұрғын өз ауласынан құдық қазып алған екен. Кейде көршілері де сол құдықтан су тартады.

Жексенбі күні қала басшысы аталмыш ауылдың тұрмысын өз көзімен көріп қайтты.

– Қанша трансформатор керек, басқа қандай жабдық қажет – осының бәрін анықтап, бюджеттен қаражат қарастырамыз, – деді Жақсылық Омар.

Қысқасы, халықпен кездесуден кейінгі қорытынды мынадай. Әкім ауызсу мәселесін шешуді орынбасары Тамара Рахимжанова мен «Өскемен Водоканал» кәсіпорны басшысына жүктеді.

Жолды «Өскемен-тәртіп» кәсіпорны қыста күреп, көктемде тазалап отыратын болды.

Ал ауыл балаларының үрейін ұшырған қаңғыбас иттердің көзі бүгін-ертеңнен қалмай жойылады.

Айтпақшы, тағы бір дүние қалып барады. Ол ауыл атауына қатысты. Тұрғындар қалжыңға сүйеп «Жаңа Меновной» дейтін көрінеді. Десе де, бұның түпкілікті атау болып қалуға жарамайтынын біледі. Бәлкім, ауылдың қызық жағдайда табылғанына байланыстырып, ерекше ат беру керек шығар...