Облыс орталығында әртүрлі үйірмелерге қатысатын жасөспірімдер мен оқушылардың арасында «Біз бақытты баламыз» фестивалі өтті, деп хабарлайды Altainews.kz тілшісі.

Мерекеге орай ұйымдастырылған фестивальге 500-ден астам бала қатысты. Олар 22 бағыт бойынша шығармашылық үйірмелерге тегін барады. Бірі ән шырқаса, енді бірі төгілдіріп күй шертті. Енді бірі мың бұрала би билеп, Сол жағалау кешеніне жиналған балақайларға мерекелік көңіл-күй сыйлады.

Сондай-ақ мерекелі күнге орай этнопарктегі киіз үйлердің бірінде «Мархабат.кз» мүгедектер қоғамының ұйымдастырумен «Ғаламат суретшілер галериясы», «Сырлы әлемге үңілу», және «Шексіз шығармашылық» атты сурет көрмесі өтіп, көпшілік қызыға тамашалады.

Осылай Сол жағалау кешеніне жиналған балақайлар бүгінгі күнді қуанышпен қарсы алып, «Біз бақытты баламыз» фестивалін тамашалап қайтты.