ШҚО-да көлік жүргізушілері жанармай таппай жүр
Риддер қаласының жүргізушілері бір жарым айдан бері жанармай таппай жүр. Әсіресе қоғамдық көлік пен азық-түлік өндірушілерге қиын тиді, деп хабарлайды «Хабар 24».
Өткен ай риддерлік кәсіпкерлер үшін оңайға соқпаған. Шаһарда шілденің басынан бастап дизельдік отын тапшы. Ал кейбір кәсіпкерлердің автобустары қаладағы бірнеше бағытта жолаушы тасымалдайды.
– Тығырықтан шығу үшін жалынып жүріп 20, 10 литрді әрең тапқан кездер болды. Әйтпесе бірнеше бағыттағы қоғамдық көліктер тоқтап, халық қиналушы еді, - дейді кәсіпкер Оксана Шульгина.
Іскер азаматтар бұл туралы қалалық әкімдік пен кәсіпкерлер палатасына шағымданған. Бір қарағанға, мәселенің туындау себебі түсінікті.
Мамандардың айтуынша, көптеген бекеттердің дизельдік отын сақтау резервуарлары едәуір кішкентай. Сондықтан тәулігіне 25-30 тонна өнім тапшы бола бастаған. Алайда дүрбелеңнің тууына басқа да себептер бар екен.
Яғни көлікке қажетті отын түрі көп болғанымен, оның жалпы көлеміне шектеу қойылған. Әйтпесе бензин де жетпей жұрт әуреге түсер еді. Ал дизельдік отынмен қамту жергілікті бекеттерге қосымша салмақ түсірген. Өйткені еліміз бойынша бөл өнімге тапшылық байқалған.
– Павлодар мұнай-химия зауытына да кезекке қояды. Сонда тұрамыз, бір апта, екі апта, бір айға дейін тосамыз. Басқа үлкен компанияға жібереді, бірінші «ҚазМұнайгазға» жібереді, содан «Гелиоске» барамыз, - дейді жанармай құю стансасы желілерінің жетекшісі Қайрат Садықов.
Мұндай ұзын кезек бір күн емес, бірнеше аптаға, тіпті айға созылады екен. Ал ірі жанар-жағармай құю стансалары жоқ елді мекендер еріксіз өнімді көтерме бағамен саудалаушы алыпсатарлардан сатып алуға мәжбүр. Бұл тауар бағасының қымбатшылығына әкелері сөзсіз. Сондықтан бұл мәселені үкімет деңгейінде шешу керек деп есептейді кәсіпкерлер.
– Бұл мәселені шешу үшін қала әкімдігі қосымша жер телімдерін бөлу жөнінде шешім қабылдады. Оған кім жанар-жағармай құю стансасын саламын дейді, рұқсат, - дейді Риддер қаласы әкімінің орынбасары Мұрат Байжұменов.