Өскеменде «Глобус» сауда үйі маңындағы Абай даңғылы мен Космическая көшесын жалғайтын өткел жаңартылады, деп хабарлайды Alainews.kz тілшісі.

Кеше қала әкімі Алмат Ақышов Өскемен қаласы әкімдігінің тиісті бөлім өкілдерімен бірге нысанға барып, жол және іргелес аумақ инфрақұрылымын жақсарту бойынша бірқатар тапсырма берді.

Әкімнің айтуынша, қазіргі бір жолақты қозғалыстың орнына екі жолақ ұйымдастыру қажет. Бұл көліктердің кептелісін азайтып, жолдың өткізу қабілетін арттырады. Сондай-ақ валеологиялық мектеп маңындағы бейберекет автотұраққа асфальт төселеді, қоқыс контейнерлері қойылатын алаңдар жөнделеді. Жоспарда аумақты көгалдандыру, тазалау және орташа жөндеу жұмыстарын жүргізу бар, бұл қала тұрғындары үшін кеңістікті барынша жайлы етуге бағытталған.

Бұл өзгерістер бірнеше мәселені бірден шешуі мүмкін: көлік қозғалысын оңтайландыру (Абай даңғылындағы кептелістен айналып өту үшін жүргізушілер бұл жолды жиі пайдаланады), қалалық кеңістікті абаттандыру және экологияны жақсарту.

Дамир Омаров