Өскеменде Конституция күні мен Қала күніне арналған концерт өтіп жатыр. Алаңға жиналған халықтың қарасы қалың.
Бүгін тұрғындар алдында танымал орындаушылар – Садраддин мен Еркеш Хасен өнер көрсетеді, деп хабарлайды Altaynews тілшісі.
Концертке сонымен қатар шығысқазақстандық өнерпаздар мен шығармашылық ұжымдар да атсалысады.
– Бүгінгі күнімді құрбыларыммен бірге алаңда өткіздім. Ақыры концерт те басталды. Шаттана билеп, көңіл көтеріп жатырмыз. Орындаушылар жақсы өнер көрсетті, – деді концерт көрермені Зарина Айдархан.

Мерекені тойлау таңмен таласа басталды. Алаңда түрлі фестиваль өтіп, “Капрезе” салатын дайындау бойынша рекорд орнатылды. Салаттан өзге, алаңға жиналған халыққа тәтті торт үлестірілді. Салмағы 200 келіден асатын торт арнайы дайындалған.

– Қала тұрғындарын мерекеге орай құттықтаймын. Жыл сайын Қала күні мен мерекелік шараларды тағатсыздана күтеміз, – дейді қала тұрғыны Ермек Иманбаев.

Естеріңізге сала кетсек, концерт түнгі сағат 22:00-ге дейін жалғасады. Шараның соңы отшашуға ұласады деп жоспарланған.