Өскеменнің этнопаркіндегі форель аулау орны жабылуы мүмкін. Себебі, Сәулет-этнографиялық және табиғи-ландшафтық мұражай-қорықтың басшылығы кәсіпкерге шартты ұзарту мүмкін еместігін мәлімдеген, деп хабарлайды Altainews.kz тілшісі.

Саябақ басшылығы шартты ұзарту құқығын ескермей, келісімшарт мерзімі аяқталғанын қателесіп көрсетіп отыр деген пікірдегі кәсіпкер ШҚО Кәсіпкерлер палатасына жүгінген.

Сонымен қатар саябақ басшылығы ШҚО прокуратурасының әр жалға алушыға түрлі мерзім берілгендігіне қатысты ұйғарымын алға тартады.

ШҚО Кәсіпкерлер палатасы басшының орынбасары Әлия Мұқашеваның, облыс прокуратурасы өкілдерінің, саябақ қызметкерлерінің қатысуымен ШҚО Кәсіпкерлер палатасында өткен кездесуде кәсіпкер бірлескен қызмет туралы типтік жалға алушы ретінде емес, инвестициялық жоба ретінде олардың шартын қарастыру туралы өтініш білдірді.

Әлия Орымбекқызының айтуынша, кәсіпкер саябақ басшылығына инвестициялық қызметті жүргізу туралы өтініш жазуы керек. Ал саябақ басшылығы прокуратураға заңнамалық деңгейде осындай қызметті жүргізу мүмкіндігі туралы өтініш жолдайтын болып шешілді.