Еліміздің Үкіметі орта бизнесті қолдаудың кешенді бағдарламасын әзірлемек.

ҚР Премьер-Министрі Әлихан Смайыловтың төрағалығымен өткен кеңесте орталық мемлекеттік органдардың және «Атамекен» ҰКП басшылығының қатысуымен орта кәсіпкерлікті дамытудың жаңа тәсілдері қаралды, деп хабарлайды Altaynews тілшісі.

Айта кетсек, VIII сайланған Парламенттің бірінші сессиясының ашылуында Мемлекет басшысы алдағы жылдары орта бизнестің бәсекеге қабілеттілігін арттыру міндетін қойған болатын. Осыған байланысты Ұлттық экономика министрлігі мемлекеттік сатып алу саласын қосқанда, орта кәсіпкерлікке қатысты реттеу рәсімдерін жеңілдету, салық төлеуге ынталандыру, инвестициялық белсенділікті арттыру, әкімшілік жүктемені азайту және орта кәсіпкерлікті қолдауды кеңейту жөнінде шаралар ұсынып отыр.

Премьер-Министр негізінен аталған тәсілдерді мақұлдап, жаңа бастамаларды әзірлеу процесіне бизнес-қоғамдастықты белсенді түрде тартудың маңызын атап өтті.

Индустрия және инфрақұрылымдық даму министрі Мұрат Қарабаевтың мәліметінше, бүгінде өңдеу өнеркәсібі саласында 501 орта бизнес кәсіпорны жұмыс істейді екен. Осы ретте шағын өнеркәсіп аймақтарын іске қосу, отандық инженерлік-техникалық қызметкерлердің шетелдік зауыттарда тағылымдамадан өтуін қамтамасыз ету, базалық шикізатты терең өңдеуді жандандыру және т.б. шаралар арқылы осы кәсіпорындарды дамыту мен жаңа жобаларды жүзеге асыру ұсынылады.

Қазақстанда құны 10 трлн теңгеден астам тауарлар мен жұмыс және қызмет түрлерін локализациялау әлеуеті бар, олардың бір бөлігін орта бизнес кәсіпорындары игере алады. Бұл бағытқа серпін беру үшін отандық өнімдерге тапсырыс берушілердің тізбесін кеңейту, сондай-ақ жүйе құраушы және квазимемлекеттік компаниялармен ұзақ мерзімге офтейк-келісімшарттар бекіту тетіктерін дамыту жоспарланып отыр.

Ал "Атамекен" ҰКП төралқа төрағасы Райымбек Баталов инвестициялық жобаларға цифрлық мониторинг жүргізу мүмкіндіктерімен таныстырып, өңірлерді дамытудағы басым салаларды мемлекеттік қолдау шараларын күшейтудің артықшылықтарына тоқталды, сондай-ақ бюджеттен қаржыландырылатын ауқымды жобаларды іске асыруға отандық кәсіпкерлерді белсенді түрде тарту қажеттігін атап өтті.

Осы ретте Әлихан Смайылов Мемлекет басшысының тапсырмалары аясында орта кәсіпкерлікті дамыту мәселесіне ерекше мән беретін уақыт келгеніне назар аудартты.

Үкімет басшысының айтуынша, тамыз айының соңына дейін орта бизнесті қолдаудың кешенді бағдарламасын әзірлеуді аяқтап, оны Шағын және орта кәсіпкерлікті дамытудың 2030 жылға дейінгі тұжырымдамасына біріктіру мүмкіндігін қарастыру қажет.