ШҚО-да биыл жол жөндеуге 25 млрд теңгеден астам қаржы жұмсалады
Фото: ашық дереккөз
2023 жылы облыстық және аудандық маңызы бар жолдарда және Шығыс Қазақстан облысының елді мекендерінің көшелерінде жол жөндеу жұмыстарын қаржыландыру көлемі 25 млрд 340 млн теңгені құрайды, 92 жобаны іске асыру жоспарлануда.
Ағымдағы жылы жалпы сомасы 18 млрд 775 млн теңгеден асатын 384 шақырымды жөндеу бойынша 85 жоба аяқталады деп күтілуде. Бұл туралы Өңірлік коммуникациялар қызметі алаңында өткен брифингте облыстық жолаушылар көлігі және автомобиль жолдары басқармасының басшысы Нұржан Жұмаділов мәлімдеді, деп хабарлайды Altaynews тілшісі.
Бұдан бөлек, облыстық және аудандық маңызы бар 242 шақырым жолды орташа жөндеуге 8 млрд теңге қарастырылған. Негізгі жол жөндеу жұмыстары Өскемен-Тарғын-Самар автожолында, Сібе көлдеріне қарай бағытта, Жаңа Бұқтырма, Ақжар кенттеріне кіреберісте, Зайсан-Шілікті, Ақжар-Шілікті, сондай-ақ басқа да ірі елді мекендерге кірме жолдарда орындалады.
Басқарма басшысы атап өткендей, жалпы, жоспарланған іс-шараларды орындау қорытындысы бойынша жақсы және қанағаттанарлық жағдайдағы облыстық және аудандық маңызы бар автомобиль жолдары үлесінің көрсеткіші 92%-ға жетуі тиіс.