Перзентханаға барып, аналарға ақ тілектерін арнады (видео)
Күршім ауданындағы Ақсуат ауылының тұрғыны Жансая Егінбаева дүниеге келген атұстары Сұлтанмен Өскемендегі Ана мен бала орталығынан үйге шығарылды.
Облыстық әйелдер істері және отбасылық-демографиялық саясат комиссиясының мүшелері жас босанған ананы қуанышымен құттықтап, гүл шоқтарын табыс етті, деп хабарлайды Altainews.kz тілшісі.
17 наурыз – Шаңырақ күні. Бұл күн сүйіспеншілік, ананы құрметтеуге, сенім, өзара көмек, мейірімділік, жанашырлық, ұрпақ сүю сияқты отбасылық құндылықтарды насихаттауға арналған.
Өскемен қаласының Ахмер ауылында тұратын Жадыра Құмарханова да бүгін сәбиімен үйге шығарылып жатыр екен. Облыстық әйелдер істері және отбасылық-демографиялық саясат комиссиясының мүшелері шуақты шаңырағына, отбасына асығып бара жатқан Жадыраға да тәтті сыйлықтары мен гүлдерін ұсынып үлгерді. Төртінші сәбиіне босанған Жадыра Ахмер ауылындағы орта мектепте бастауыш мұғалімі болып істейді.
