«Бұқтырма уылдырық шашу және өсіру шаруашылығы» ЖШС базасында ақ амур балығын қолдан көбейту, өсіру және сату бойынша коммерциялық жоба қолға алынған. Аталған жоба «Ғылым қоры» АҚ қолдауымен және грант қаражаты есебінен жүзеге асырылуда.

Мамандардың айтуынша, тоғанға ақ амур балығын жіберген кездегі басты мәселе – оның өсіп-өнуі, көбеюі болған. Алайда қолға алған жұмыстардың арқасында зауыттық әдіспен балық көбейтуге мүмкіндік туды. Ақ амур балығын тоғанда көбейту және өндіріске енгізу тәжірибесі сәтті жүзеге асырылды, деп хабарлайды Аltainews.kz тілшісі.

«Бұқтырма уылдырық шашу және өсіру шаруашылығы» ЖШС мен «Балық шаруашылығы ғылыми-өндірістік орталығы» ЖШС серіктестікте жұмыс істейді, ақ амур балығын қолдан көбейтуде ғылыми-өндірістік орталық ғылыми тұрғыда қолдау көрсетіліп отыр.

Жобаны коммерцияландыру аясында «Бұқтырма уылдырық шашу және өсіру шаруашылығы» ЖШС-да бірқатар жөндеу жұмыстары жүргізілген. Оның ішінде балық цехы толық жөнделіп, арнайы қондырғылар, киімдер мен оргтехника, 13 арнайы техника, сондай-ақ заманауи зертханалық құрал-жабдықтар сатып алынған.

Жаңа жұмыс орындары ашылып, кәсіпорындағы жұмысшылар саны көбейген. Қазір онда жергілікті жердің тұрғындарына 30 жұмыс орны ұсынылған.

Фото: «Бұқтырма уылдырық шашу және өсіру шаруашылығы» ЖШС