Өскеменнің іргесіндегі «Дарын» лагері жаңғыртылатын болады
ШҚО оқушылары жазғы каникулдарын қызықты әрі тиімді өткізуде. Мәселен, Өскеменнің іргесіндегі «Дарын» лагеріне Шығыс Қазақстанның барлық қалалары мен аудандарынан оқушылар келеді. Жөндеуден кейін мұнда демалатын балалардың саны арта түспек, деп хабарлайды Altainews.kz тілшісі.
Биыл облыстағы 93 514 оқушы (99,9 пайыз) демалыспен қамтылады. Өңірдегі 12 лагерьде осы жазда 8575 бала демалады.
Мұнда бесреттік тамақтану режимі қарастырылған. Медициналық корпус жұмыс істейді. Дәрігер мен медбике лагерьде тәулік бойы тұрады. Аумақ толығымен қоршалған, балалардың қауіпсіздігін мамандандырылған күзет бақылайды, бейнебақылау камералары орнатылған. Тәрбиешілер мен тәлімгерлер корпуста балалармен бірге тұрады.
ШҚО білім басқармасының мәліметінше, биыл мұнда 1700-ден астам бала демалады.
Облыстың қалалары мен аудандарынан мүмкіндігінше көп оқушылар демалуы үшін және жағдай барынша ыңғайлы болуы үшін лагерьді жаңарту қажет. Ол келесі жылы басталады деп күтілуде. Лагерьді аралау барысында Шығыс Қазақстан облысының әкімі Ермек Көшербаев жобалау-сметалық құжаттаманы қазірден бастап әзірлеуді тапсырды. Сондай-ақ мұнда аспалы жол салу мүмкіндігі қарастырылады.
Аталмыш лагерьде тоғызқұмалақ, шахмат, дойбы, үстел теннисі, роботты техника, ителлектум, әдеби клуб, рафтинг, алмасты мозаика мен сабын қайнату сияқты түрлі бағыттағы үйірмелер жұмыс істеп тұр. Бұдан бөлек роллердром, бассейн, АРТ-студия, джампинг студиясы, вокалды-аспапты студия, психологиялық сергу бөлмесі де бар. Спорт алаңында балалар футбол мен воллейбол, баскетбол ойнайды. Сондай-ақ домбыра шертуді, асық ойнауды да меңгереді.
Лагерьде балалардың тіл үйренуіне де баса назар аударылған. Олар күнделікті өзара қазақ, орыс және ағылшын тілдерінде сөйлеп, сөздік қорларын молайтуда.
Аймақ басшысы жауапты сала мамандарына лагерьдегі балалардың білімімен, тәлім-тәрбиесімен қатар, олардың күнделікті қауіпсіздігіне, сапалы тамақтануына да ерекше көңіл бөлуді қадап тапсырды.