Бүгін Жаңа жыл қарсаңындағы игі дәстүр бойынша «Гостиный двор» сауда кешенінде Шығыс Қазақстан облыстық жұмыспен қамту және әлеуметтік бағдарламаларды үйлестіру басқармасының ұжымы мүмкіндігі шектеулі балаларды құттықтады, деп хабарлайды Altainews.kz тілшісі.

Жаңа жылдық шырша мерекесіне арнайы әлеуметтік қызмет көрсету орталығындағы 50 бала мен олардың ата-аналары қатысты.

Шырша мерекесіне жиналған балаларды алда келе жатқан Жаңа жыл мерекесімен Облыстық жұмыспен қамту және әлеуметтік бағдарламаларды үйлестіру басқармасы басшысының орынбасары Динара Қожанова құттықтады.

Жаңа жылдық  шоу-бағдарламада Эльза, Аққала, Бұғы сияқты танымал ертегілер мен мульфильмдердің кейіпкерлері, Аяз Ата мен Ақшақар түрлі қойылымдар қойып, балаларға қуанышты көңіл-күй сыйлады. Шырша маңында мерекелік ән мен би, қызықты ойындар ұйымдастырылды.

Қуаныштан жүздері бал-бұл жанған балаларға Аяз Ата мен Ақшақар тәттілермен қоса бағалы сыйлықтар үлестірді.

Айта кетсек, жаңа жылдық шыршаға 18 жасқа дейінгі балаларға арналған Өскемен қаласындағы арнайы әлеуметтік қызмет көрсету орталығының балалары мен ата-аналары шақырылған.

Айжанат Бақытқызы

Видео: Евгений Щетников