ШҚО-да ерекше азаматтардың тұрмысын жақсарту – басты назарда
Фото: depositphotos.com
Шығыс Қазақстан облысында мүмкіндігі шектеулі азаматтардың өмір сүру сапасын арттыруға ерекше назар аударылуда. Бұл бағытта кешенді бағдарламалар қабылданып, әлеуметтік қолдау, инфрақұрылымды бейімдеу, медициналық оңалту және жұмысқа орналастыру сияқты көптеген шаралар жүзеге асырылып жатыр.
Әсіресе, ерекше қажеттіліктері бар жандардың құқықтарын қорғауға және олардың қоғам өміріне белсене араласуын қамтамасыз етуге басымдық берілуде. Осыған орай, облыстағы әлеуметтік бағдарламаларды үйлестіру басқармасы мен жергілікті билік тарапынан жүйелі жұмыстар атқарылып келеді, деп хабарлайды Аltainews.kz тілшісі.
Мүмкіндігі шектеулі жандарды (МШЖ) жеке оңалту бағдарламаларына сәйкес техникалық оңалту құралдарымен, ымдау тілі мамандарының қызметімен, жеке көмекшілермен және санаторлық-курорттық емдеумен қамтамасыз ету әлеуметтік қызметтер порталы арқылы жүзеге асырылады. Мұнда азаматтар қажетті құралдарды, қызметтерді және жеткізушілерді өздері таңдайды.
2024 жылы осы мақсаттарға барлық қаржы көздерінен 3 303 млн теңге бөлінді, оның ішінде республикалық бюджеттен – 590 млн теңге, облыстық бюджеттен – 1 559 млн теңге, қалалар мен аудандар бюджеттерінен – 1 154 млн теңге.
2024 жылдың 1 қыркүйегіндегі жағдай бойынша порталда МШЖ тарапынан 10 847 өтініш қабылданды, олардың 87,4%-ы немесе 9 471 өтініш орындалды. Осыған орай 2 053 млн теңге игерілді. Дегенмен, кейбір өңірлерде көрсеткіш орташа деңгейден төмен болып отыр. Мысалы, Өскемен қаласында орындалу деңгейі – 84,6%, Самар ауданында – 76,7%, Үлкен Нарын ауданында – 40%.
2023-2027 жылдарға арналған әлеуметтік инфрақұрылым нысандарын бейімдеу және ерекше қажеттіліктері бар адамдарға арналған инфрақұрылымды жақсарту жоспары бекітілді. 2024 жылы 383 нысанды бейімдеу жоспарланса, оның тек 41-і ғана бейімделген. Қалған 342 нысан жыл соңына дейін бейімделуі тиіс.
Облыстың алты өңірінде «Инватакси» қызметі ұйымдастырылған. Бұл қызмет арнайы жабдықталған көліктер арқылы халықтың қозғалуы қиын топтарын тасымалдауды қамтамасыз етеді. 2025 жылдан бастап «Инватакси» мемлекеттік қызметке айналады, сондықтан жергілікті атқарушы органдар алдағы жылға қаржы қарастырып, жеткізушілерді анықтауы қажет.
2024 жылы республикалық бюджеттен менталдық ауытқулары бар 467 балаға санаторлық-курорттық емдеу үшін 193 млн теңге бөлінді. Бірақ бұл бағытта кейбір аудандарда жұмыс жеткіліксіз жүргізілген. Сонымен қатар Өскемен және Зайсан аудандарында иппотерапия және бейімделген атқа міну қызметтері ұйымдастырылды, бұл қызметтерге 127 адам қатысуда.
Облыста мүмкіндігі шектеулі жандар мен қарттарға арналған 10 стационарлық мекеме жұмыс істейді. Олардың жалпы сыйымдылығы 2 014 адамды қамтиды. Сонымен қатар аймақта санаторлық-курорттық қызметтер көрсететін екі коммуналдық мемлекеттік мекеме бар: «Үбі» санаторийі және Алтай ауданындағы оңалту орталығы, – дейді ШҚО әлеуметтік бағдарламаларды жұмыспен қамтуды үйлестіру басқармасының басшысы Альмира Мусинова.
Арнайы әлеуметтік қызмет көрсету мекемелерінде қызмет алушылардың тамақтану сапасы басты назарда. Алайда азық-түлік бағасының өсуіне байланысты қосымша 72 млн теңге қажет. Бұл мәселені шешу үшін тиісті шаралар қабылдануда.
Мүмкіндігі шектеулі азаматтардың өмір сүру сапасын арттыруда кешенді шаралар жүзеге асырылуда. Бірақ кейбір бағыттарда шешімін күткен мәселелер бар. Осы жұмыстардың барлығы ерекше қажеттіліктері бар адамдардың құқықтарын қорғауға және өмір сапасын жақсартуға бағытталған.
Шығыс Қазақстан облысында мүмкіндігі шектеулі азаматтарға көрсетілетін қолдау жылдан-жылға артып келеді. Әлеуметтік қызметтер жүйесін жетілдіру, инфрақұрылымды бейімдеу, медициналық оңалту мен жұмыспен қамту салаларындағы табысты қадамдар қоғамның әлсіз топтарына үлкен көмек болып отыр.
Дегенмен, әлі де шешімін күткен мәселелер бар екенін атап өткен жөн. Алдағы уақытта атқарылатын жұмыстар ерекше қажеттіліктері бар азаматтардың өмір сүру сапасын одан әрі жақсартуға бағытталады және олардың қоғамда тең мүмкіндіктерге ие болуына ықпал етеді.
Ержан Әбіш
