Қазақстандықтардың Бірыңғай жинақтаушы зейнетақы қорындағы (БЖЗҚ) жинақтары 2025 жылғы 1 ақпанда 22,6 трлн теңгеден асты. Бұл өткен жылмен салыстырғанда 25%-ға көп, деп хабарлайды Altainews.kz тілшісі.

Қордың ресми мәліметіне сәйкес, зейнетақы жинақтарының негізгі бөлігі – 21,7 трлн теңге міндетті зейнетақы жарналары есебінен қалыптасқан. Сонымен қатар, міндетті кәсіптік және ерікті зейнетақы жарналарының көлемі де өсуде. Әсіресе, ерікті жарналар бойынша жинақтар 45%-ға ұлғайып, жоғары қарқын көрсетіп отыр.

Жыл басынан бері салымшылардың шоттарына 234 млрд теңгеден астам зейнетақы жарналары түсті. Бұл өткен жылдың сәйкес кезеңімен салыстырғанда 25%-ға артық. Ал қаңтар айында БЖЗҚ-дан жеке тұлғалар мен сақтандыру ұйымдарына аударылған төлемдер мен аударымдар 128 млрд теңгеден асты. Оның басым бөлігі тұрғын үй жағдайын жақсарту мен емделуге арналған біржолғы төлемдерге бағытталған.

Қазіргі уақытта БЖЗҚ-дағы жеке зейнетақы шоттарының жалпы саны 17,2 млн-ға жетті. Оның ішінде 12,5 млн шотқа міндетті зейнетақы жарналары түседі. Сондай-ақ, жаңа енгізілген жұмыс берушінің міндетті зейнетақы жарналары бойынша да шартты шоттар саны артып келеді.

Зейнетақы активтері туралы толық ақпаратты enpf.kz сайтынан табуға болады.