Шығыс Қазақстан мемлекеттік университетінде «Конституциялық заңдылық пен құқықтық тәртіпті қамтамасыз ету – құқықтық мемлекеттің тұрақты дамуының кепілі ретінде» тақырыбында халықаралық ғылыми-тәжірибелік конференция өтті. Іс-шара Қазақстан Республикасының Конституциясына 30 жыл толуына арналды, деп хабарлайды Altainews.kz тілшісі.

Жиынның басты мақсаты — конституциялық құндылықтарды терең зерделеп, оларды қоғам өміріне тиімді енгізудің нақты жолдарын ұсыну. Конференция аясында құқық қорғау органдары, заң мамандары мен жоғары оқу орындарының оқытушылары ашық пікір алмасты. Конференция жұмысына ҚР Мәжілісінің депутаты Ерлан Саиров, облыстық соттың төрағасы Манат Комиршинов, облыстың бас прокуроры Алмат Байшулаков, облыстық сыбайлас жемқорлыққа қарсы қызмет басшысы Денис Шакенов қатысып, ойларын ортаға салды. 

ҚР Конституциялық соты төрағасының орынбасары, заң ғылымдарының кандидаты Бақыт Нұрмұханов өз сөзінде елімізде осы күнге дейін төрт ауқымды конституциялық реформа жүргізілгенін атап өтті. Әсіресе, 2022 жылы Мемлекет басшысының бастамасымен жүзеге асқан реформаның тарихи мәніне ерекше тоқталды. Аталған реформаның маңызды нәтижесі – Конституциялық соттың құрылуы болды.

Конституцияға енгізілген өзгерістердің тәжірибеде жүзеге асу деңгейін талқылаған сарапшылардың бірі — конституциялық реформаларға тікелей қатысқан, жұмыс тобының мүшесі Сара Идырышева болды. Ол өз сөзінде құқықтық және саяси ғылым салаларында жаңа конституциялық нормалардың іске асу мәселелері әлі де жан-жақты зерттеуді қажет ететінін айтты. Оның пікірінше, дәл осындай халықаралық форматтағы ғылыми кездесулер конституциялық жаңашылдықтарды талқылауға арналған тиімді платформа болып табылады.
Бас прокурордың Конституциялық соттағы өкілі, кеңесшісі Талғат Адамов өз сөзінде Конституцияның азаматтардың құқықтары мен бостандықтарын қамтамасыз етудегі шешуші рөліне тоқталды.

Шығыс Қазақстан мемлекеттік университетінің ректоры Төлеген Мұхтар Бақыт Нұрмұхановтың аталмыш жоғары оқу орнының түлегі екенін, осы білім ордасында оқып, үш жыл қызмет атқарғанын мақтанышпен атап өтті. 

Конференция барысында ұсынылған бастамалар мен ғылыми пікірлер конституциялық заңдылықты жетілдіру, құқықтық мәдениетті арттыру және азаматтардың құқықтарын қорғау бағытында маңызды негіз болмақ. Мұндай кездесулер құқықтық мемлекеттің тұрақты дамуына тың серпін береді.

Фото/видео: Ермек Жиенбеков