Ұлттық ұланның «Шығыс» өңірлік қолбасшылығында бос орындар жәрмеңкесі өтті.

Іс-шараға елуден астам жұмыс іздеуші қатысты, деп хабарлайды Altaynews.kz тілшісі.

Өңірлік қолбасшылықтың басқарма мамандары жұмыс іздеушілерге әскери қызметке тұру барысы және мемлекет тарапынан көрсетілетін қолдау жөнінде егжей-тегжейлі айтып берді.

Жауапты қызметке орналассам деп келген азаматтың бірі – Алексей Дегтяров. Абай облысы Үржар ауданының тумасы. Өскеменде еңбек етуді ойға алған азамат алғашында жиһаз цехына жұмысқа кірген. Кейін жұмыс тұрақсыз болғандықтан шығып кеткен көрінеді. Енді Ұлттық ұлан қатарында сап түзеуді мақсат еткен.

Ол алдағы уақытта 3477 әскери бөлімінде қызмет атқарамақ. Жеке пікір алмасу кезінде осындай шешімге келген көрінеді.

Іс-шара барысында арнайы сауаланама жүргізіліп, әскери қызметтің қыр-сыры баяндалды. Қызметке орналасу үшін қандай құжат қажет екені айтылды. Енді бос орындар жәрмеңкесі желтоқсан айында өтеді.