Күршім ауданы Тақыр ауылында телефон байланысы да, мобильді интернет те  жоқ. Тұрғындар туған туыстарының амандығын, қаладағы студент балаларының қажеттілігін білу үшін трасса бойына шығып, байланыс іздейді  немесе көрші ауылға барып, әбігерге түседі. Мұғалімдер электронды журналды көрші ауылға барып толтыруға мәжбүр, деп хабарлайды Altaynews.kz тілшісі.

«Ауылға 2023 жылдың мамыр айында мобильді байланысты қамтамасыз ететін қондырғыларды әкеліп орната бастады,бірақ әлі қосылмады, жұмыс аяқсыз қалды. Осы жұмысты тиісті лауазымдық басшылар жауапкершілікпен қолға алып, қадағалап, іске қосуын сұраймыз. Адамдар кенеттен ауыра қалса не төтенше жағдайлар болғанда байланысқа шығу мүмкін емес», - дейді тақырлықтар.

Қазіргідей ауа райы күрт бұзылып, шалғайдағы ауылдар қар құрсауында қалып жатқанда, орталықпен ешқандай байланыс көзі жоқ елді мекендердің жағдайы тіпті алаңдатады.

«Тақыр ауылында 162 адам тұрады. Ауылда мобильді интернеттің жоқ екені рас. Ауылды интернетпен «Востоктелеком» ЖШС лицензиялық міндеттемелері шеңберінде 2023 жылдың 31 желтоқсанына дейін қамтамасыз етуге тиіс болатын. Алайда ол міндеттемелер орындалмады. Осыған байланысты, Цифрлық даму, инновациялар және аэроғарыш өнеркәсібі министрлігінің Телекоммуникация комитеті радиожиілік спектрін пайдалануға рұқсатты сот тәртібімен алып, кейіннен басқа ұялы операторға беру бойынша жұмыс жүргізуде», - деді Күршім ауданы әкімінің орынбасары Мейіржан Қанатбекұлы.

Сонымен қатар, «Қолжетімді Интернет» Ұлттық жобасы аясында Тақыр ауылында байланыс операторларының талшықты-оптикалық байланыс желілерін салуы 2026 жылдың соңына дейін жоспарланған.

Сондай-ақ, шалғайдағы ауылдарды төмен орбиталық спутниктік интернетпен қамтамасыз етуді іске асыру мерзімдерін қысқарту мақсатында Тақыр жалпы білім беру мектебінде тестілік қосылулар жүргізу үшін Интернетке жоғары жылдамдықты кең жолақты спутниктік қолжетімділікті қамтамасыз ету үшін спутниктік жүйені бөлу мүмкіндігі сәуір айында көзделген.

Бұл бағыттағы жұмыс жалғасуда және тұрақты бақылауға алынған.