Еліміздегі ақылы жолдардың тарифтері көтеріледі
Фото: gov.kz
Қазақстанда ақылы жолдар қымбаттамақ.
Бұл туралы ҚР Көлік министрі Марат Қарабаев Сенат отырысында мәлімдеді, деп хабарлайды Altainews.kz тілшісі.
Министрдің айтуынша елдегі ақылы жолдардың бағасы 2013 жылдан бері өзгермеген.
-Тарифті көтеруді жоспарлап отырмыз. Неге екенін түсіндіріп кетейін. 2013 жылдан бері тариф 11 жыл бойы өзгермеген, былтыр 20 пайызға өскен. Біздің тарифтерді көршілес Ресеймен салыстырып көрейік, егер Қазақстанда тариф 1 теңге 20 тиын болса, Ресейде ұлттық валютамызға аударғанда - 7 теңге. Жолдар сапалы болуы үшін арнайы техникалық қызмет көрсету, жөндеу керек. Халық бұл шығындар салық төлеушілер есебінен болғанын қаламайды. Сол себепті эалғыз жол – тарифтерді көтеру, -деді ол.
Көлік министрі ақылы жолдардың тарифі көтерілгенімен, қатты қымбаттамайтынын айтты.
-Тарифті екі-үш есеге көтеру туралы да ұсыныстар болды. Алайда баға олай көтерілмейді. Бірақ, белгілі мөлшерде пайыз қосылады, -деді министр.
Ақылы жолдардың бағасын халық пікіріне құлақ аса отырып бекітпек. Тарифтер туралы талқылау наурыз айында басталады деп жоспарлануда.
