Былтыр Қазақстанда антибиотикке сұраныс 47,7% төмендеген. Мұндай бактерияға қарсы препараттарды ішкі нарықта сату көлемі соңғы бірнеше жылда ең төменгі деңгейге жетті, деп хабарлайды Altainews.kz сайты Naryk.kz сайтына сілтеме жасап.

Елімізде 40 тоннадан сәл астам антибиотик қолданылған. 

Ішкі сұраныстың төмендеуіне байланысты шетелдік жеткізушілер осы санаттағы препараттардың ҚР-ға экспортын қысқартты: былтыр физикалық мәндегі көрсеткіштер екі есе – 62,4 тоннадан 28,9 тоннаға дейін төмендеді. 

Бір қызығы, Қытай бірнеше жылдан бері Қазақстан үшін антибиотиктің негізгі жеткізушісі болып келеді. 2023 жылы бұл елдің үлесі 59,5% болды. Экспорттаушылар арасында Үндістан екінші орында, Ресей үшінші орында.

Сұраныс пен импорттан кейін мұндай дәрілік заттардың отандық өндірісі де былтыр тоқырауға ұшырады. ҚР СЖРА Ұлттық статистика бюросының мәліметіне сәйкес, 2023 жылы қазақстандық фармацевтикалық зауыттар небәрі 12,3 тонна антибиотик өндірген. Бұл өткен жылмен салыстырғанда 12,6% аз. Антибиотиктердің отандық өндірісі пайдаланылған ресурстардың 29,9%-ын ғана қамтиды.

Бұл ретте мына үрдісті атап өтуге болады: антибиотикке сұраныстың төмендеуі суық тиіп ауырудың аясында болып жатыр. ҚР Денсаулық сақтау министрлігінің мәліметінше, 2022 жылмен салыстырғанда былтыр жоғарғы тыныс жолдарының жедел инфекцияларының таралуы 2,7 есе өскен. Қызылша індеті Қазақстан тарихындағы рекордтық көрсеткішке жетті. 

ҚР Фармацевтикалық қызметті қолдау және дамыту қауымдастығының президенті Марина Дурманованың айтуынша, былтыр жергілікті фармацевтикалық компаниялардың нарықтағы үлесі физикалық көлемде 39,8%, ақшалай 16,7% болған. Яғни, елдегі дәріханалар мен ауруханалардағы қымбат дәрілердің негізгі бөлігін импорттық дәрілер құрайды деген сөз.

Қазір елімізде 97 фармацевтикалық өндіруші жұмыс істейді. Оның 34-і ғана дәрілік заттар өндірумен айналысса, қалған 63-і медициналық мақсаттағы бұйымдарды өндіруге маманданған.

Қауымдастық басшысы алдағы үш жылда қазақстандық фармацевтикалық өндірістің нашарлауы мен тоқырауы мүмкін деп болжап отыр. Өйткені 2026 жылдың 1 қаңтарынан бастап ЕАЭО-ға мүше елдердің фармацевтикалық компаниялары шығаратын барлық дәрілік заттар Еуразиялық одақтың талаптары мен ережелерін ескере отырып, қайта тіркеуден өтуі тиіс. 2025 жылдан кейінгі барлық ұлттық маркетингтік рұқсаттар жойылады. 

«Бұл отандық өндірушілер шығаратын дәрілердің көпшілігі нарықтан кетуге мәжбүр болады деген сөз. Бұның өзіндік бірқатар зардаптары болады», — деп атап өтті қауымдастық президенті.