Өлкетану музейінде қуғын-сүргін құрбандарын еске алды
Саяси қуғын-сүргін және ашаршылық құрбандарын еске алу күніне орай облыстық тарихи-өлкетану музейінде ашық есік күні өтті, деп хабарлайды Altainews.kz тілшісі.
Музейге келген қонақтар зұлмат заманның көрінісін бейнелейтін көрмені және Алаш арыстарына туралы деректі фильмді көрді.
– Өткен тарихты тасқа басып, сол арқылы өскелең ұрпақты ұлтжанды етіп тәрбиелеу біздің негізгі міндеттеріміз деп есептеймін. Сондықтан жыл сайын осы датаға орай ашық есік күнін өткізіп, тағылымды іс-шаралар ұйымдастырып келеміз, – дейді музей қызметкері Альфия Бақбаева.
Іс-шараға қатысқан Шоқан Уәлиханов атындағы №3 мектеп-лицейінің оқушылары мен ұстаздары музей экспозициясымен және өлке тарихының өткенінен сыр шертетін «Тағдырды байланыстырған тәлкек» атты көрмемен танысып, ашаршылық туралы құнды мағлұмат алды.
– Саяси қуғын-сүргін құрбандары мен ашаршылық жайлы мектепте кітап бетінен оқысақ, бүгін көрмені көріп көп дүниені көз алдымыздан өткізгендей болдық. Тарихтағы сол бір қиын кезеңдегі оқиғаларды естіп, суреттерді көрдік. Тәуелсіздік аңсаған Алаш арыстарының тағдыры да бізді бейжай қалдырмады, – дейді оқушы Томирис Әлихан.
Осылай оқушылар мен ұстаздар өткен тарих өрнегінен ой түйіп, елдік мүдде жолында мерт болған ақтаңгерлердің рухына тағзым жасады.
Оқи отырыңыз
