Президенттікке кандидат Салтанат Тұрсынбекованың штабында ұйымдастыру комитетінің мәжілісі өтті.

Жиын барысында қатысушылар үгіт-насихат кезеңінің жоспарларын бекітіп, алда болатын іс-шаралар жайлы талқылады, деп хабарлайды Altaynews  «Астана» телеарнасына сілтеме жасап.

Кандидат үгіт-насихат кезеңінде ірі кәсіпорындардың ұжымымен, көпбалалы аналармен, орман және жануарларды қорғаушылармен, дағдарыс орталығында көмек алып жатқандармен кездесуді жоспарлап отыр.

Салтанат Тұрсынбекова кезектен тыс президенттік сайлауға "Қазақ аналары - дәстүрге жол" республикалық қоғамдық бірлестігінің атынан қатысады. Ол заң саласында 20 жылға жуық жұмыс істеген.

"Қызметкерлердің заңда көрсетілген, тіркелген санына қарап, қай бағыттар бойынша жұмыстар өткізуіміз керек, солармен қызметкерлер жұмысты бастап кетті. Ешқандай кедергі жоқ. Бәрі жақсы көңіл күйде. Жұмысқа дайын. Жоспар бойынша барлық 20 өңірге барып қайтсам деген ойым бар. Бірақ реалист болу керек", - деді  презденттікке үміткер Салтанат Тұрсынбекова.