Өскемендегі ерекше балаларға арналған балабақшалардың бірінде құм терапиясы кабинеті жұмыс істеп тұр. Ашылғанына көп бола қоймаса да, жаңа кабинеттің пайдасын сезініп үлгергендер аз емес, деп хабарлайды  Altainews.kz тілшісі.
Осыдан біраз бұрын облыс орталығындағы «Мархабат» коррекциялық балабақшасында балаларды құммен емдейтін кабинет жұмысын бастаған болатын. Бұл кабинетті жергілікті ата-аналардың бірі ашқан. Ол үшін мемлекеттен грант алған.

Оның айтуынша, жаңа кабинетте жергілікті балалармен құм терапиясы сабақтары өткізіледі. Бұл сабақтарға психикалық және сөйлеу дамуының кешеуілдеуі бар балалар қатысады. Юлия Кизилова әзірге сабақтарды өзі жүргізіп жүргенін айтады. Ол сонымен қатар, тәжірибелі психологтан білім алып жүр екен. Өйткені, әр балаға жеке тәсіл қажет, дейді ол.

Балабақшада жаңа кабинеттің ашылғанына ата-аналар да риза. Сондай ананың бірі Назгүл Мұстафинаның айтуынша, мұндай кабинеттер баланың емін-еркін өсіп, жан-жақты дамуына жол ашады.

Жалпы, соңғы жылдары дәл осындай тың бағыттарға түрең салып, кәсібін дөңгелетіп әкеткендер аз емес. Мұны облыстық еңбек ұтқырлығы орталығының директоры Арайлым Есімбекова да айтты.

Айта кетейік, жаңа бизнес-идеяларды іске асыруға бағытталған гранттар халықтың әлеуметтік осал топтары қатарындағы адамдарға конкурстық негізде 400 айлық есептік көрсеткіш мөлшеріне дейін беріледі екен. Бұл санатқа атаулы әлеуметтік көмек алушылар, бірге тұратын төрт және одан да көп кәмелетке толмаған баласы бар отбасылар, асыраушысынан айрылу жағдайы бойынша әлеуметтік төлем алушылар, қоныс аударушылар, қандастар, еңбекке қарсы көрсетілімдері жоқ мүгедектігі бар адамдар, мүгедектігі бар бала тәрбиелеп отырған адамдар және олардың жұбайлары кіреді.
Белгілі болғандай, ағымдағы жылы жаңа бизнес-идеяларды іске асыруға 216 мемлекеттік грант беру жоспарланған. Грантқа үміткерлер электрондық еңбек биржасының business.enbek.kz порталында өз бетімен электрондық сандық қолтаңбасымен куәландыру арқылы өтініш бере алады.

Нұржан Кенжеұлы

Фото/видео: Ермек Жиенбеков