«Алтай» биылғы ел біріншілігіндегі ең ірі жеңісін тойлады. Семейдің «Спартак» стадионында Теміртаудың «Шахтер-Болатын» қабылдаған жерлестеріміз қарсыласын 5:0 есебімен талқандады, деп хабарлайды Алтайньюс тілшісі.

Аталған ойындағы есеп кездесудің 44-ші минутында ашылды. Гол «Алтайдың» жартылай қорғаушысы Константин Заречныйдың еншісінде. Ал екінші тайм бастала салысымен, қонақ команда қақпасының торында тағы бір доп тулады.

Бұл жолы қорғаушы Алексей Подпругин көзге түсті. Араға үш минут салып дәл осы Подпругин есепті 3:0-ге жеткізді. Алтайлықтар мұнымен шектелмей, ойынның соңына дейін қалған уақытта әбден есеңгіреген теміртаулық команданың қақпасынан тағы екі рет саңылау тауып, биылғы біріншіліктегі ең ірі жеңісіне жетті. Бұл голдардың авторлары – «Алтайдың» чемпионаттағы үздік мергені Сергей Дудкин мен қорғаушы Василий Билый.

Осы жеңісінен кейін 35 ұпай жинаған семейлік ұжым келесі кездесуін қонақта түркістандық «Мақтаарал» командасымен өткізбек. Бұл ойын 2 тамызда ойналады.