Облыста, оқу жылының бірінші айындағы мәлімет бойынша, 29 оқушы коронавирус індетін жұқтырған.

Тауарлар мен көрсетілетін қызметтердің сапасы мен қауіпсіздігін бақылау департаментінің ақпаратына сүйенсек, олардың 13-і кезекші сыныптарда оқыса, 16-сы қашықтан білім алады.

Департамент мамандары кезекші сыныптардағы оқушылардан сырқат белгісі таңертеңгілік тексеру кезінде анықталғанын айтады.

– Облыс аумағында коронавирус ошағына айналған мектептердегі кезекші сыныптарды қашықтан оқытуға ауыстыру туралы қаулы шығарылды. Қауіпті вирус анықталған барлық мектепте эпидемияға қарсы сантиариялық-дезинфекциялық шаралар жүргізілді, – деді жоғарыда аталған мекеменің баспасөз хатшысы.

Айта кету керек, 30 қыркүйекте вирус жұқтырған оқушылар саны 27 болған. Сол кезде олардың алтауы емделіп шыққаны хабарланған болатын.

Білім басқармасының мәліметінше, облыстағы 647 мектепте 191 757 оқушы оқиды. Оның ішінде 376 мектеп штаттық режимде жұмыс істесе, 271 мектеп ішінара қашықтан сабақ жүргізеді.