Кеше ШҚО-ның бірнеше ауданында 7 ғимараттың шатырын жел ұшырды, деп хабарлайды Altaynews тілшісі.

ТЖД ақпараты бойынша, Көкпекті ауданының Тассай ауылында М.Әуезов атындағы орта мектеп ғимаратының шатырын жел ұшырған. Абай ауданының Құндызды ауылында  Ш.Әбенов атындағы мектептің, Жарма ауданының Қапанбұлақ ауылында – Т.Қасенұлы атындағы мектептің, сондай-ақ, Жарма кентіндегі әкімдіктің, ауыл клубының, «ҚТЖ» АҚ-ның және мешіттің ғимараттары шатырсыз қалды.

Зардап шеккендер тіркелмеген. Келген шығынды жергілікті атқарушы органдардың өкілдерінен құрылған комиссия анықтайды.

Сонымен қатар, кеше қатты желдің салдарынан Көкпекті, Күршім, Жарма аудандарының бірқатар елді мекендері жарықсыз қалды.