Петропавлда кикбокстан халықаралық дәрежедегі спорт шебері Азамат Нұрпейісовті еске алуға арналған Қазақстан кубогы үшін жарыс мәресіне жетті.

Аталмыш додаға республиканың облыстары мен қалаларынан 100-ден астам спортшы қатысты. Арасында Семейден барған кикбоксшылар да болды.

Дәлірек айтсақ, жарыста семейлік бапкер Қайрат Смағұловтың үш шәкірті өнер көрсетіп, үшеуі де жүлделі орыннан көрінді. Мәселен, фулл-контакт бәсекесінде Серікбол Ермаков (60 келіге дейінгі салмақ) топ жарса, К-1 санатында Қанағат Нұрғалиевке (71 келі) тең келер ешкім болмады. Тағы бір жүлде К-1 сайысында сынға түскен Евгений Суринның (К-1, күміс медаль) еншісіне жазылды.

Тағы бір атап өтер жайт, турнир қорытындысы бойынша жерлестерімізді бастап апарған Қайрат Смағұловқа ұйымдастырушылар атынан «Құрметті спорт қызметкері» төсбелгісі берілді.