ШҚО-да "Цифрлық Шығыс-2019" IT - форумы аясында бірінші облыстық "Алтай 2019" IT-хакатоны өтті.

Хакатонның бас жүлдесі - облыс әкімінің гранты болатын. Қатысуға өтінімдер 21 қазаннан 13 қарашаға дейін қабылданған еді. Алғашқы хакатонға алты команда іріктеп алынып, 18-19 қараша аралығында қатысушылар жобамен жұмыс істеді.

Екі күнге созылған шараның барысында ақпараттық технологиялар саласының мықты мамандары командаларға бірігіп, өз өнімдерін жасап шықты. Ұсынылған алты жоба білім беру мен спорт мекемелерінде IT-саласын жақсартуға бағытталған.

Бүгін өткен форум барысында хакатонның жеңімпаздары анықталды. Әділ қазылар алқасының қорытындысымен Coding Skills командасының жобасы үздік деп танылып, 2 миллион теңгенің серификатын иеленді. Облыс әкімінің грантын жеңіп алған жобада спорттық мектептер мен университтерге арналған оқу-білім беру порталын құру көзделген екен. Оның нәтижелерін алдағы уақытта көре жатармыз.

Сондай-ақ, форумда оқушылар арасында қазан айында өткен StartUp-жобалардың жеңімпаздары да марапатталды. Облыс әкімі Даниал Ахметовтың шешімі бойынша, жоба құрған қатысушылардың барлығына гранттар үлестірілді.

Осылайша, облысымызда білім мен ғылымға талпынған жастарға өз идеялары мен жобаларын жүзеге асыру үшін барлық жағдай жасалып жатыр деп айтуға болады.