С.Аманжолов атындағы Шығыс Қазақстан мемлекеттік университетінде әскери кафедра ашылды, деп хабарлайды Алтайньюс тілшісі.

Енді Аманжолов шәкірттері білім ордасынан офицер атанып шығады.

– Әскери кафедрада 2-курстан жоғарғы студенттер оқи алады. Ол үшін алдымен медициналық тексеруден, кәсіби-психологиялық тестілеуден өтіп, 20 мамырға дейін өтініш беріп үлгеру керек. Талапкерлерді іріктеу 1-20 тамыз аралығында өтетін болады, – деп мәлімдеді университеттің баспасөз қызметі.

Кафедра ағымдағы оқу жылында студенттерді үш мамандық бойынша оқыту жоспарлап отыр: «Аумақтық қорғанысты ұйымдастыру және жоспарлау», «Құрлық әскерлерінде тәрбие және идеологиялық жұмыстарды ұйымдастыру», «Психологиялық жұмыстарды ұйымдастыру».

Айта кетейік, әскери мамандарды дайындау үшін аталмыш білім ордасына 45 оқу гранты бөлінді.