ШҚО-да 76 адам ата-ана құқығынан айырылды
Фото: kaz.zakon.kz
Биыл облыс бойынша183 кәмелетке толмаған жасөспірім мен 298 «тұрақсыз отбасы» құқық қорғау органдарының есебіне алынған.
Сондай-ақ бала тәрбиесі бойынша талаптарды орындамаған 76 заңды өкіл ата-ана құқығынан айырылған. Бұл туралы ШҚО ПД жергілікті полиция қызметі басқармасы бастығының орынбасары полиция подполковнигі Әділжан Хамитов Орталық коммуникациялар қызметі алаңында өткен брифингте мәлімдеді, деп хабарлайды Altaynews тілшісі.
- Жыл басынан бері кәмелетке толмағандарды бейімдеу орталықтарына 251-ге жуық жасөспірім жеткізілді. Комиссиялардың отырыстарында 404 материал қаралып, сот шешімімен 76 заңды өкіл ата-ана құқығынан айырылса, 21-і ата-ана құқықтары шектелді, - деді Әділжан Хамитов.
Сонымен қатар төрт мыңға жуық кәмелетке толмағандардың заңды өкілдері әкімшілік жауапкершілікке тартылған.
Полиция подполковнигінің айтуынша, кәмелетке толмағандарға қатысты зорлық-зомбылық сипаттағы жыныстық қылмыстардың алдын алу, тиісті бірлескен іс-шаралар жоспары да әзірленген көрінеді.
- Талдау көрсеткендей, балалар негізінен өздері сенген немесе тәуелді болған жақын адамдары тарапынан зорлық-зомбылыққа ұшырайды. Айта кету керек, мұндай қылмыстардың орын алуының бір себебі – ата-ана тарапынан бақылаудың болмауы, балаларын қараусыз қалдыру, - деп атап өтті ол.
Оқи отырыңыз
