Шығыс Қазақстан облысының құтқарушылары облыс орталығының кішкентай тұрғындарына ғажайып жаңажылдық мереке сыйлады.

Өскемендегі  Самал саябағының аумағында төтенше қызмет өкілдері балаларға жол талғамаймын көліктерді көрсетті. Арнайы техникалар бүлдіршіндерге әлдебір мультфильм қаһармандарының ғажайып көлігіндей көрінді білем, таласа-тармаса машина салонына жайғасып, құтқарушылармен бірге саябақ аумағын шарлап қайтты, деп хабарлайды Altaynews.kz тілшісі. 

Бұл мерекелік іс-шара қауіпсіздік тақырыбымен астасып жатты. Олай дейтініміз, көліктерді қызықтап болған балаларға құтқарушылар қауіпсіздік ережелері жөнінде сұрақ қойды. Жарыса жауап берген білгірлерге тосыннан келген Аяз ата мен Ақша қар тарту жасап, мереке көрігін қыздырды.

— Құтқарушы қызметінің қыр-сыры балалар үшін ғажайыппен тең. Сол себепті Жаңа жыл қарсаңында оларға ерекше көңіл-күй сыйлағымыз келді. Сондай-ақ оқыс оқиғалар жиілеп кететін мереке күндері балақайлар қауіпсіздік ережелерін қаперде ұстап жүреді. Біздің алға қойған мақсатымыз да осы еді, — дейді ШҚО ТЖД баспасөз хатшысы Марина Лискова.

Қаһарман-қызметкерлердің дегені болды. Кішкентай бүлдіршіндердің ұмытылмас эмоция алғаны көздерінен көрінді.