Облыста стоматология саласының орта буын медициналық кадрларын даярлауда дуалды оқыту бағдарламасы қолданылатын болады.
Өңірімізде орта буын медицина мамандарын даярлайтын стоматологиялық колледж және жоғары медициналық колледж сияқты екі орта оқу орны бар, - деп хабарлайды Altaynews.kz тілшісі.
Соған қарамастан облыста бүгінде орта буын медициналық қызметкерлердің де, стоматологиялық емханалар мамандарының да тапшылығы білінеді. Кадрлардың білім сапасын арттыру мақсатында облыста стоматологиялық қызметкерлерді даярлауда дуалды оқыту жүйесін енгізу қолға алынбақ.
- Қазіргі таңда ең тиімді білім беру - ол дуалды оқыту жүйесі. Бізде Согра жылу-электр орталығында осындай тәжірибе баяғыдан қолданылып келеді. Студенттер алған білімдерін біз әзірлеген арнайы бағдарлама бойынша орталықта тәжірибеде қолданып, дағдыланады, соның нәтижесінде болашақ электрик мамандар өз мамандықтарын жоғары деңгейде меңгеріп жүр. Енді осындай тәжірибені медициналық колледждерде де қолданбақпыз, - деді облыстық білім беру басқармасының басшысы Инесса Чернышева - Бүгін біз колледж директорларымен, әлеуметтік серіктестермен жиналып, заманауи талаптарға сай оқу бағдарламасын қалай құруға болатынын талқыладық.
Осы мәселеге қатысты жиналған колледж директорлары және Өскемен қаласының стоматологиялық клиникаларының басшылары, әлеуметтік серіктестер кадрларды даярлау сапасы, өндірістік тәжірибеден өту және колледж түлектерін жұмысқа орналастыру туралы ой-пікірлерін ортаға салды.
- Бүгінде әлеуметтік серіктестермен – облыстың негізгі емдеу ұйымдарымен ынтымақтастық туралы 40 – тан астам шарт жасалдыБіз орта буын медициналық кадрларға мұқтаж медициналық ұйымдарға колледжбен және студентпен болашақ мамандарды оқыту бойынша үшжақты шартты бекітуді ұсынамыз. Қазір бізде бірнеше келісімшарттар жасалды, соның ішінде ауылдық жерлердегі медициналық ұйымдармен де. Олар оқу ақысын төлейді, оқуын бітірген студент осы медициналық мекемеде жұмыс істеуге міндетті. Биыл осындай жүйе бойынша бір маман бітіріп шығады. Барлығы төрт студент оқиды, уақыт өте келе одан да көп болады деп ойлаймыз ,-деп атап өтті Өскемен жоғары медициналық колледжі директорының оқу-өндірістік жұмыс жөніндегі орынбасары Рахия Иматова.
Әлеуметтік серіктестіктердің бірі - «Асыл төре» ЖШС директоры Дәулет Қабимолдиннің айтуынша, олар он жылдан бері стоматологиялық колледж және жоғары медициналық колледж студенттерімен тығыз қарым-қатынаста жұмыс істеп келеді. Қызметкерлерінің тоқсан пайызы осы екі оқу орнының түлектері. Биыл бітірген алты түлек те осы клиникаға жұмысқа орналасыпты.
- Сонымен қатар мен мамандарымыздың біліктілігін көтеру мәселесін айтқым келеді. Осы колледждердің базасында жылына бір-екі рет біліктілікті ұштау семинарлары, тренингтері ұйымдастырылса, - деген ұсынысын ортаға салды Дәулет Қабимолдин.
- Биылғы оқу жылының аяғына дейін оқу бағдарламасына дуалды оқыту жүйесінің кейбір элементтерін енгізіп, сынақтан өткіземіз. Бағдарламаны келесі оқу жылында толық енгізсек деген ойымыз бар, - деп қорытындылады Инесса Чернышева.
