2024 жылы Шығыс Қазақстан облысы аумағында қасқыр санын реттеу мақсатында 442 қасқыр мен шибөріні атуға рұқсат беріледі, деп хабарлайды Altaynews.kz тілшісі.

 Шығыс Қазақстан облыстық орман шаруашылығы және жануарлар дүниесі аумақтық инспекциясының ақпараты бойынша, 

2024 жылғы арналған Қазақстан Республикасы аумағында қасқыр мен шибөріні атудың рұқсат етілген көлемін анықтауға биологиялық негіздеме бекітілген.

Негіздемеге сәйкес 2024 жылы Шығыс Қазақстан облысы аумағында қасқыр санын реттеуге лимит - 442.

Бүгінде саны реттеуге жататын аңдарды атуға рұқсат беру бойынша мемлекеттік қызмет автоматтандырылған режимде көрсетіледі.

Яғни, қасқырлар мен шибөрілерді ату үшін онлайн түрде рұқсат алуға болады. Аталған қызметті алу үшін жеке және заңды тұлғалар «электрондық үкімет» веб-порталы арқылы электрондық-цифрлық қолтаңбамен өтінім жолдауы қажет.

Барлық қажетті құжаттарды тапсырғаннан кейін өтінім берушінің "жеке кабинетіне" қабылданғаны туралы хабарлама жіберіледі.

Айжанат Бақытқызы