Қаһарлы қыста қар құрсауында қалған Марқакөл ауданына 20 тонна жем мен қажетті дәрі-дәрмек жеткізілді. Тұрғындар да қол қусырып отырмай, жолды қардан тазартып келе жатқан «Шығыс-жол» жұмысшыларына ыстық тамақ пен отын жеткізіп берді.

Ұранхай ауылына дейін жеткен дәріні Төсқайың ауылына қарай моторлы шанамен жіберген. Ал қаладан жеткізілген жемді қажет болған жағдайда қар құрсауынан шығарылған жылқыларға беруді жоспарлап отырғандарын айтты, деп хабарлайды Altaynews.kz тілшісі.

Тұрғындар елді мекендердің арасындағы жолдардың ашылып жатқандығы туралы видеолар мен суреттерді әлеуметтік желіге жариялап жатыр. Ал ауыл адамдарының бір-біріне атпен қатынап жүргендерін видеодан көруге болады. Табиғи сипатта төтенше жағдай жарияланған Марқакөл ауданында осылай жағдай біртіндеп реттеліп келеді.

Суреттер ауыл тұрғындарынан алынды