Опырылу орнының барлық периметрі бойынша жарықтар пайда болды. Бұл өте қауіпті.

Бұған дейін кішігірім жарықшалар пайда болған кезде топырақ опырылған болатын, деп хабарлайды Altainews.kz сайты.

ҚР ТЖМ ақпаратына сүйенсек, Павлодар облысындағы «Майқайыңалтын» АҚ аумағындағы опырылу орнында экскаваторлар топырақ пен тау жыныстарын қайта экскавациялауды жалғастыруда. Өткен  күні солтүстік беткей бойынша экскаваторлармен шамамен 25 текше метр көлемінде топырақты қайта экскавациялау жүргізілді.

«Майқайыңалтын» АҚ аумағында опырылған жердің барлық периметрі бойымен жарықшалар пайда болды. Топырақтың бұл жағдайы өте қауіпті.  Бұған дейін кішігірім жарықшалар пайда болған кезде топырақ опырылған болатын.

Авариялық-құтқару және кезек күттірмейтін жұмыстарды жүргізу мүмкін болмаған жағдайда, төтенше жағдайды жою басшысы бірінші кезекте төтенше жағдай аймағындағы адамдарды құтқару бойынша барлық мүмкін шараларды қабылдай отырып, аталған жұмыстарды толықтай немесе олардың бір бөлігін тоқтата тұру туралы шешім қабылдауға құқылы.

Айта кеткен жөн, кен байыту комбинатында шұңқырға түсіп кеткен жұмысшыларды іздестіру жұмыстары басталғалы бір ай өтті. Автобус жүргізушісі мен тағы бір құтқарушы әлі табылған жоқ.