Өскеменде суда жүзуден еліміздің мемлекеттік және саяси қайраткері Бердібек Сапарбаевты еске алуға арналған жарыс ұйымдастырылды. 

Бұл жолғы бәсеке облыстық су спорты түрлері бойынша мамандандырылған балалар-жасөспірімдер олимпиадалық резерв спорт мектебінің тәрбиеленушілері арасында өтті, деп хабарлайды Altainews.kz тілшісі.

Жарысқа 100-ге тарта жас спортшы қатысты. Бұл туралы турнирдің бас төрешісі Кирилл Шмурыгиннен білдік.

Оның айтуынша, турнирде түрлі жарыстарға қатысып, біраз тәжірибе жинап үлгергендермен бірге, үлкен спортқа енді ғана қадам басқан балақайлар да өнер көрсетті. Мәселен, 12 жастағы Ералы Замекеннің бұл спортқа ден қойғанына алты жылдың жүзі болыпты.

Айта кетейік, бұл ақпан айында Өскеменде суда жүзуден өтетін соңғы жарыс емес. Келесі аптада дәл осы Орталық бассейн ғимаратында облыс чемпионаты да өтеді деп жоспарланып отыр.