Алтай ауданына жұмыс сапарымен барған ШҚО әкімінің орынбасары Бақытжан Байахметов жылу құрылымдарын тексеріп, алдағы жылу маусымына дайындық жұмыстарымен танысты, деп хабарлайды Altainews.kz тілшісі. 

Серебрянск қаласының орталық қазандығы 89 көп пәтерлі үй мен 200-ден астам жер үйді жылумен қамтамасыз етеді. Тұрғын үйлерде екі мыңнан астам абонент тұрады.

Облыс әкімінің орынбасары 2024 жылға арналған жөндеу жұмыстарының жоспарымен танысты. Алтай ауданының басшылығы биыл қазандық орнатуды, қосалқы қуат станциясын, көмір қоймасын, түтін құбырын, желілік сорғы мен шатырларды жөндеуді, электр тіректерін ауыстыруды жоспарлап отыр және бұған 500 млн теңге жұмсалады деп есептейді.

Алайда жұмыс кеңесінде Бақытжан Байахметов есеп-қисапты қайта бір тексеруді тапсырды. Оның айтуынша, шығынды біршама төмендетуге болады.

Ал Жаңа Бұқтырма кентінде қазақ тілінде оқытатын екі жүз орындық мектеп салынып жатыр. Облыс орталығынан барған арнайы жұмыс тобы құрылыс басына барып, жұмыс барысын көрді. Жоспар бойынша құрылыс жұмыстары қараша айында аяқталуға тиіс.

Сондай-ақ кенттегі дәрігерлік амбулатория толық жөнделеді. Бүгінде бес мыңнан астам адамға қызмет көрсететін мекеменің ғимараты 1972 жылы тұрғызылған, содан бері жөндеу көрмеген. Қазір мердігермен келісімшарт жасалды, жөндеу жұмыстары жуық арада басталады.

Облыс әкімінің орынбасары жергілікті атқарушы органға осы мәселені бақылауда ұстап, жұмыстарды уақытлы аяқтауды тапсырды.

Сондай-ақ Серебрянск қаласында халықтың әлеуметтік осал тобына арналған бес қабатты нысан пайдалануға беріледі. Ғимарат моноқаланы кешенді дамыту жоспарына сәйкес қайта жаңартылмақ. Бұл жұмыс 2025-2026 жылдарға жоспарланған. Облыс әкімінің орынбасары Бақытжан Байахметов ғимаратты тексерді.

Алдағы уақытта мұнда әлеуметтік осал топқа жататын отбасылар қоныстанады. Сондай-ақ жас мамандарға тұрғын үй беру жағы да қарастырылмақ. Тұрғын үйде 40 пәтер болады.