ШҚО әкімі бас шаһарды дамыту бойынша кеңес өткізді
Шығыс Қазақстан облысының әкімі Ермек Көшербаев Өскемен қаласын дамыту бойынша кеңес өткізіп, шағын аудандардың барлығына бірдей назар аудару керек екенін айтты, деп хабарлайды Altainews.kz тілшісі.
Сондай-ақ өңір басшысы көлік инфрақұрылымына, атап айтқанда, автотұрақтар мәселесіне тоқталды. Өйткені жол бойында қалған машиналар, көбінесе, коммуналдық қызметтердің жұмысына кедергі келтіреді. Облыс әкімі қар жылдам еріп жатқан қазіргі кезде ең алдымен адамдар көп баратын жерлерде жұмыс істеу керектігін алға тартты.
Сондай-ақ жиында Амфитеатр аймағында Татуласу алаңы пайда болатыны айтылды. Ондағы ескерткіш ретке келтіріледі. Қалада әртүрлі аудандарда абаттандыру бойынша бірқатар жобалар бар, көгалдандыру аясында 27 мың ағаш отырғызылады. Сонымен қатар, биыл облыс орталығының 28 көшесі мен 57 шақырым жолды жөндеу қарастырылған.
Облыс әкімі жауапты бөлімдерге қала тұрғындарының мүдделерін ескере отырып, тозығы жеткен және апатты тұрғын үй мәселесін қарастыруды тапсырды.