ШҚО-да республикалық дзюдо турнирі мәреге жетті
Облыс орталығында 2007-2008 жылғы жасөспірімдер арасында дзюдодан республикалық турнир өтті. Еліміздің түкпір-түкпірінен жиналған жүз елуден астам жас спортшы еңбек сіңірген жаттықтырушы Жаңаділ Атаевтың жүлдесін сарапқа салды, деп хабарлайды Altainews.kz тілшісі.
Жаңаділ Атаев – өңірде самбо және дзюдо күресінің негізін қалаған жаттықтырушы. Табаны күректей қырық жыл тер төккен білікті маман 120-дан астам Әлем және Азия чемпиондарын, Олимпиада жүлдегерлерін, спорт шеберлерін баптады.
Жасөспірімдер арасындағы жарысты дзюдо ардагерлері де арнайы келіп тамашалады. Құрметті қонақтар қатарында дзюдодан елімізден шыққан тұңғыш әлем чемпионы Максим Раков пен дүниежүзілік жасөспірімдер ойынының чемпионы Ерлан Сіләбаев болды.
Турнир қорытындысы бойынша жерлестеріміз төрт алтын, төрт күміс және тоғыз қола жүлдеге қол жеткізді.