Облыстық мәслихаттың кезекті қырық екінші сессиясы барысында даңқты спортшы қызымыз, облыстық мәслихаттың депутаты Ольга Рыпакова өзінің депутаттық қызметін мерзімінен бұрын тоқтататындығын мәлімдеді.

Басты себеп – алдағы Токио Олимпиадасына тыңғылықты дайындыққа кірісу.

– Бұл қызметте сіздермен қоян-қолтық жұмыс істеп, халыққа барынша жақын болуға тырыстым. Өңірдің спорт саласын дамытуға біраз болса да үлес қосқаныма қуанамын. Өздеріңіз де жақсы білесіздер, Токио – менің соңғы Олимпиадам болмақ. Сондықтан бар уақытым мен күш-жігерімді дайындыққа арнамақпын. Бірге жұмыс істеген баршаңызға үлкен алғысымды айтамын, – деді Ольга Рыпакова.

Өз кезегінде депутаттар мен облыс әкімінің бірінші орынбасары Алмасхан Сматлаев та Ольгаға өңірдің әлеуметтік-экономикалық дамуына, спортының өркендеуіне қосқан еңбегі, осыған дейінгі депутаттық қызметі үшін алғыс білдіріп, алдағы дүбірлі додада сәттілік тіледі.