–Партияның алдағы үш жылда еліміз бойынша 1 мың ІТ-сынып ашу жөніндегі жобасының маңызы зор. Қазір республикада 697 сынып ашылған, соның 277-сі біздің облыста. Яғни, әрбір үшінші сынып Шығысқа тиесілі болып отыр, – деді Даниал Ахметов.

Партияның «Мектеп асханаларын жаңғырту» жобасы алғаш Шығыс Қазақстанда іске асырыла бастаған. Қазіргі кезде 577 мектепте (88 пайыз) ыстық тамақтандыру ұйымдастырылған, қалғандарында буфеттер жұмыс істейді. Жобаның мақсаты – асханалардың құрал-жабдықтарын жаңалау, тағамның сапасын арттыру. Әзірге Өскемен мен Семейдің 10 мектебінде осы жұмыстар атқарылып жатыр.

«Мектептік спорт алаңдары» жобасы бойынша аудандарда бес спорт алаңы ашылған, «Қазақстан кітапханалары – замануи білім орталықтары» жобасы бойынша Өскемен, Семей, Риддер, Алтай қалалары мен Бесқарағай аудандарында коворкинг орталықтары құрылған. «Ағылшын тіліне оқыту» жобасы аясында жаз маусымында 20 балалар лагері жұмыс істеп, 4500 оқушыға тіл үйретілді, сондай-ақ ауыларда 16 ағылшын тілін оқыту клубы ашылған. «Ардагерлерді ардақтайық», «Нұр Отан – балаларға», «Баланы мектепке жинайық» сынды аса маңызды жобалар бойынша да облыс көлемінде жоспарлы жұмыстар атқарылып келеді.