Түркияға көлікпен саяхаттау қанша тұрады?
Әлеуметтік желіде Түркияға жеңіл көлікпен жеткен өскемендік азаматтардың сапары көпшіліктің қызығушылығын тудырды. Altainews.kz тілшісі сапардың ерекшеліктері мен қиындықтары туралы жолға шыққан саяхатшылармен сұхбаттасты.
Өскеменнен 6000 шақырымды артқа тастап, Түркияға жеткен саяхатшылар жолға алты күн жұмсаған екен. Бұл сапар әрбіреуіне орта есеппен 150 мың теңгеге түскен.
Ақижан бұл сапарды екі жыл бойы жоспарлаған. Жолға шығар алдында көлігін толық тексеруден өткізіп, сенімділігіне көз жеткізіпті. Одан кейін жолдастарын ертіп, сапарға шыққан.
Өскеменнен шыққан саяхатшылар Солтүстік және Батыс Қазақстан арқылы Ресейдің Астрахан қаласына жеткен. Одан әрі Шешенстанның Грозный қаласы, Солтүстік Осетия, Ингушетия арқылы Грузияның Батуми қаласына тоқтап, Түркия шекарасынан асқан.
– Теңізді айналып өтетін маршрут құрастырдық. Астраханда су үстіндегі қалқымалы көпірден өтуге 700 теңге төледік. Грузияда автосақтандыру қажет болды, оны онлайн түрде 10 мың теңгеге жасадық. Ал Түркияның шекарасында автосақтандыруға 7 мың теңге жұмсадық. Шекарадағы тексерістерде еш қиындық болған жоқ. Тек Шешенстанның кеденшілері тыйым салынған заттар бар-жоғын мұқият тексерді, – дейді Ақижан.
Сапардың жетінші күні саяхатшылар 6500 шақырымды еңсеріп, Анталиядан Қаш қаласына жеткен. Енді олар Стамбулға бет алуды жоспарлап отыр.
Ақерке Рағызбаева
