Кеше Виктор Храпунов пен оның жұбайы Лейла Храпуноваға қарсы сот процессі өткен еді. Енді Храпуновтар отбасының Қазақстандағы дүние-мүлкі толық тәркіленіп жатыр, деп хабарлайды Алтайньюс тілшісі.

Естеріңізге сала кетсек, сот үкімі бойынша экс-әкім Виктор Храпунов 17 жылға сотталса, Лейла Храпуноваға 14 жылға бас бостандығынан айыру жазасы тағайындалған болатын. Сондай-ақ, олардың дүние-мүлкі тәркіленіп, мемлекеттік қызметте жұмыс істеуге тыйым салынып отыр.

Айта кетсек, Алматының элиталы ауданындағы жеке меншік үй мен вилла, 10 пәтер, «Самал» ықшам ауданындағы көлік тұрағында үш орын және Әл-Фараби даңғылының бойында бірнеше гараждары, Алматы облысының Еңбекшіқазақ ауданындағы үш жер телімі тәркіленіп алынды. Сондай-ақ, Храпуновтардың Шығыс Қазақстанда да талай мүлкі бар екен: Өскемен қаласында төрт жер телімі және кеңсе ғимараты, Көкпекті ауданында үш жер телімі.

Бұлардан бөлек, Храпуновтың бақылауындағы компаниялардың шотындағы және шотына түсіп жатқан қаржы да тәркіленбек.