Германияның Юстус-Либиг Гиссен университетінің профессоры, доктор Йорн Аренс Сәрсен Аманжолов университетінің студенттеріне мәдени әлеуметтану пәні бойынша дәрістер оқуда, деп хабарлайды Алтайньюс тілшісі.

Профессор дәрістерінің ерекшелігі сол – ол қоғамдағы өткір мәселелерді «Искатели», «Непрощенный», «Имитация жизни» және өзге де әйгілі кинофильмдерді мысалға ала отырып қарастырады екен. Фильм сюжеттерін қолдана отырып ол жастар назарын экранда жасырынған қазіргі заманның көкейкесті проблемаларына аударады.

– Ғалым дәрістер барысында жастарға әйелдердің қоғамдағы орны мен рөлі, отбасы ішіндегі күрделі қарым-қатынастар, әйелдің жеке тұлғасы, гомосексуализм, нәсілшілдік және өзге де тақырыптарды қаузайды, – деп хабарлайды оқу орнының баспасөз қызметі.

13 қазанға дейін жалғасатын дәрістер сәрсенбі мен жексенбіден өзге күндері №1 оқу ғимаратының 218 дәрісханасында сағат 8.55-тен бастап жүруде.