Астана полицейлері Геннадий Головкиннің жеңісіне ұтыс тіккен соң, өзін-өзі өртеп жіберді делінген видео авторын тапты, деп хабарлайды Алтайньюс тілшісі.

– WhatsApp-та таралған видеода автор Астанадағы Күйші Дина көшесінде әлдебіреудің ұтыс үшін өзін-өзі өртегені жайлы айтады. Полицейлер жалған видео авторын анықтады, – деп жазылған елордалық ІІД өкілдерінің хабарламасында.

28 жастағы елорда тұрғыны өртті видеоға түсіріп, оны сыныптастарының чатына тек қызық үшін жолдағанын айтқан.

– Айыпты азамат жалған хабар таратқанын мойындап, қазақстандықтардан кешірім сұрады, – деп мәлімдеді елордалық полицейлер.

ІІД өкілдері жалған хабар таратқандардың қылмыстық жауапкершілікке тартылатынын тағы еске салады.