Өскемен қаласы  волейболдан клубтық командалардың әйелдер арасындағы Азия Чемпионатын өткізуге дайын. Биыл Ертістің жағасында екінші рет  өткелі  отырған құрлықтық жарысқа 9 команда қатысады, деп хабарлайды Алтайньюс тілшісі.

Сайысалды баспасөз мәслихатында тоғыз команданың жаттықтырушылары мен капитандары өз пікірлерін білдіріп,  жарысқа қаншалықты дайын екендіктерін жеткізді. «Алтай» командасының жаңа жаттықтырушысы Юрий Панченконың айтуынша, өткен жылы жіберілген қателіктер биыл қайталанбауы керек.

-Биылға жарыста медаль үшін барымызды саламыз,-деді қазақстандық команданың жаттықтырушысы.

Командалардың барлығы өздеріне толықтай сенімді екендіктерін баспасөз мәслихатында айтылған бапкерлердің сөздерінен байқадық. Жапония мен Тайланд командасы тек қана «алтын» үшін келгендерін анық айтты. Бұл қатарға қытайлық волейболшыларды да жатқызуға болады. Тек Индонезия мен Шри Ланка командаларының бапкерлері ғана өздеріне сәл сенімсіздік білдіргендей болды.

Тағы да естеріңізге сала кетейік, аталған додаға  құрлықтың 9 командасы қатыспақ.

Командалар үш топқа бөлінген. «А» тобында Тайланд, Жапония және Қытай құрамалары өзара мықтыны анықтайды.

Ал Қазақстан «В» тобында қытайлық Тайпей және Иран құрамаларымен  сынға түседі.

Отандастарымыз Азия чемпионатындағы алғашқы ойынды Иранға қарсы өткізеді.

Сондай-ақ, «С» тобында Вьетнам, Индонезия және Шри-Ланка құрамалары бір-біріне қарсы ойнайды.

Клубтар арасындағы Азия біріншілігінде ел чемпионы атанған «Алтай» волейбол командасы сынға түседі. Осы орайда айта кетейік, волейболшылар мамырдың аяғында Түркия елінде екі апталық жаттығу жиындарын өткізіп келген болатын.