Өскеменде өтіп жатқан волейболдан қыздар командалары арасындағы Азия чемпионатында жарысты қытайлық "Тяньцзинь Боxай Банк" командасы бастады.

Алғашқы ойынында қытайлық ұжымға Вьетнамның "Вьетин Банк Клуб" командасы қарсы тұрды. Жарыс басталмай тұрып-ақ чемпиондыққа басты үміткердің бірі саналған Аспанасты елінің командасы бұл матчта мықтылығын дәлелдеп, қарсыласын еш қиындықсыз ұтты. Ойын кезеңдеріндегі есеп 25:15, 25:21, 25:16. Қорытынды есеп 3:0. Осылайша, жұлдыздылар (ред. - Қытай Халық Республикасы мен Вьетнамның тулары бір-біріне өте ұқсас, екеуінде де сары жұлдыз суреті бейнеленген) шығысымыздағы көршілеріміздің мерейі үстем болды.

Ертең "Тяньцзинь" волейболшылары басты қарсыластарының бірі - жапониялық "Хисамицу Сеяку Спрингс" волейболшыларына қарсы ойын өткізбек. Ойын кешкі сағат 16:30-да басталады.

Нұржан Кенжеұлы