Шығыс Қазақстан облысына заңсыз қару-жарақтарын полиция органдарына өз еркімен өткізген тұрғындарға сыйақы төлеу үшін 27 млн. теңге бөлінді, деп хабарлайды Аltaynews.kz тілшісі облыстық ІІД-нің баспасөз қызметіне сілтеме жасап.
Тұрғындардан заңсыз қару-жарақты сатып алу акциясы 1-қыркүйекте басталған болатын. Осы уақыт аралығында шығысқазақстандықтар құқық қорғау органдарына 292 дана қару өткізіп үлгерді. Олардың 45-сі иір ойықты мылтық, оның ішінде біреуі шолақ мылтық. Тапсырылған 247 тегіс стволды қарудың 4-уі шолақ мылтық, бұдан басқа иір ойықты мылтыққа арналған 2094 патрон өткізілді.
Қару-жарақ өткізген азаматтарға сыйақылар акция аяқталған соң төленеді.
Аталмыш акцияның 31-қазанға дейін ұзартылғанын естеріңізге сала кетеміз.